dtt-net.com forum

Zërat e rrezikshëm evropianë për copëtimin e Kosovës

Shkruan Xhafer Shatri


Ka tridhjetë vjet që hapur flitet për ndarjen e Kosovës. Këtë ide e ka shpikur dhe këmbëngul në të elita serbe. Sipas saj, meqë Kosovën nuk po mund ta mbajmë të tërën, duhet ta marrim pjesën e luanit…, me ndryshimin e rrethanave, kërkesat janë redukuar, pa rënë kurrë nën 40% të territorit të Kosovës, e cila ka vetëm 10’877km2 për dy milionë e gjysmë banorë të saj.

Kohët e fundit kur po shihet se pavarësia nuk ka alternativë, personalitete me peshë në BE, po e përvijojnë tashmë krejt hapur ndarjen e Kosovës, si shpërblim për sakrificën që po bën Serbia!



Çka do të thotë ndarja e Kosovës?



Kosova është ndër vendet më të vogla të kontinentit. Pavarësisht problemeve që ka, megjithatë ajo ka të gjitha mundësitë të jetë një vend normal, me një zhvillim mesatar.

Ndarja e saj, në çfarëdo forme qoftë, do të jetë shumë më tepër se sa paraqet për njeriun amputimi, këputja e njërës prej katër gjymtyrëve kryesore.

Praktikisht ndarja e Kosovës do të thotë:

- Destabilizim serioz e përgjithmonë i vendit;

- Thellim të armiqësive ndëretnike në vend dhe rajon edhe për një kohë shumë të gjatë;

- Rrezikim serioz i serbëve që duan të jetojnë në shtëpitë dhe tokat e tyre në pjesët e Kosovës që do t’i shpëtojnë briskut mizor;

- Hapje e mundësive për veprimtari të grupimeve terroriste që do të trazonin vendin vazhdimisht dhe do të pengonin investimet e huaja duke shkaktuar kështu përkeqësimin e gjendjes ekonomike në vend dhe ekzodin masiv të të rinjve që mëtojnë të shpëtojnë nga darët e skamjes dhe mungesa e perspektivës…

Një shtet i tillë i pavarur, por sakat nuk i duhet askujt. Më së pakut popullit të Kosovës.

Zërat për copëtimin e vendit tonë nuk janë të rastit. Në mesin e shteteve të BE-së ka vende që kanë interesa të mëdha ekonomike në Serbi, dhe ato, natyrisht se do të mbrojnë interesat e tyre. Por problemi më i madh qëndron aty se bashkësia ndërkombëtare ka investuar shumë në profilizimin dhe sajimin e elitës politike të Kosovës. Vetë fakti se paria e jonë ka pranuar, përmes planit të Ahtisarit, njëlloj multifederalizimi të Kosovës dhe tash përballë rrezikut serioz për copëtimin e vendit nuk i dëgjohet asnjëherë zëri, flet mjaft. I vetmi politikan shqiptar me peshë, që ka ngritur këtë çështje në vazhdimësi është Sali Berisha.

Megjithatë historia ka dëshmuar më se njëherë se, pavarësisht nga zyrtarët tanë të papërgjegjshëm, në momente vendimtare, në Kosovë kanë dalur në pah forca politike dhe personalitete me moral të pacënuar të gatshëm të sakrifikohen për të mbrojtur interesat jetike të vendit.

E ky interes sot nuk është data e shpalljes teatrale të pavarësisë, që prej muajsh është kthyer në një garë qesharake, por tërësia territoriale e Kosovës.



Si mund të pengohet ndarja ?



- Ndërtimi i institucioneve të qëndrueshme, në radhë të parë i një parlamenti që do të shtrojë në mënyrë të vendosur si çështje parësore integritetin territorial të vendit;

- Krijimi i mekanizmave efikase të kontrollit që do të mundësojë një qeverim të mirëfilltë;

- Ekzistimi i një opozite të fortë;

- Paralajmërimi serioz e zyrtar fuqive vendimmarrëse (jo përmes gazetave, siç praktikohet te ne!) se ndarja e Kosovës do të thotë konflikte pambarim.

- Një lobim e shpjegim gjithpërfshirës për këtë çështje, në radhë të parë në Washington, me qëndrime konkrete :

Se serbëve të Kosovës do t’u njihen e do t’u respektohen absolutisht, e një për një, të gjitha të drejtat; por se nuk do të pranojmë kurrë, që Serbia të ketë çfarëdo të drejte në Kosovë ose mbi Kosovën.



Roli i mediave mbetet i pazëvendësueshëm. Ato kanë për detyrë morale e profesionale ta informojnë opionin për rrezikun real të cënimit të tërësisë territoriale të vendit dhe pasojat e shumta që sjell ndarja e Kosovës për të gjithë njerëzit që jetojnë në të.



Por, më në fund, faktori më serioz që mund ta mbrojë terësinë territoriale të Kosovës, padiskutim është Maqedonia.

Ngulitja e një vetëdijeje te qarqet ndërkombëtare vendimmarrëse se ndarja e Kosovës do të çojë në mënyrë të pakthyeshme te ndarja e Maqedonisë nuk mund të mbetet pa efekt, qoftë edhe te ata që propozojnë shembullin e Tërstit, të Sllavonisë lindore ose te ata që urrejtjen e merrkan si arsyetim për copëtimin e Kosovës.

Jam krejt i sigurt se liderët kryesorë të shqiptarëve në Maqedoni, Arben Xhaferi, si maja e mendimit politik shqiptar sot, dhe Menduh Thaçi e Ali Ahmeti si personalitete kyçe në vend, janë të vetëdijshëm për rolin historik që duhet të luajnë në muajt e vështirë që po vijnë për Kosovën.

Duke i njohur personalisht si atdhetarë e burra të vendosur, jam krejt i sigurtë se ata me shumë bashkëveprimtarë të tyre, pavarësisht nga dallimet që mund të kenë, do të vihen edhe kësaj radhe në shërbim të Kosovës. Ashtu siç kanë qenë gjithë jetën e tyre.